Unod sa mga balita ang mga kasikas sa politika sa nilabay nga mga bulan ug dili malikayan nga aduna nay mga hungihong sa pagkiling sa mga politiko ngadto sa nakita nila kusgan ug adunay pabor sa pwersa ug kahumot sa publiko. Kung sugdan nato sa natad sa nasudnon nga politika adunay pipila ka mga dagkung pangalan ang nagalutaw sa publiko ilabina sa “social media”. Kamatikdan usab ang mga alyansa sa mga partidong politika.
Kung obserbahan ug maayoang mga personalidad nga nagalutaw sa yanang sa politika nisikat ug maayo ang pangalan ni kanhi Speaker Cong. Martin Romualdez sa Kamara ang gidungog nga posibleng modoagan sa pagkapresidente sa 2028 Elections apan gidumog pud dayon kini ug mga isyu sa korapsyon hinungdan nga nga ni-resign kini ug gipulihan sa iyang kaalyado nga si Congressman Bojie Dy.
Human ni Romualdez, nigawas na usab ang pangalan ni Senadora Resa Hontiveros nga kamatikdang nagsige na pagawas ug mga video interviews sa social media ug nagpasiatab nga interesado siyang modagan isip presidente o bise presidente, depende sa madesisyonan sa ilang i-organisa nga “united opposition” alang sa 2028 Elections. Apan nikalit ug kausab ang dagan sa dihang nibisita si Presidente Ferdinand “Bongbong” Marcos (PBBM) sa Naga ug nakigkita ni kanhi Bise Presidente ug kasamtangang Mayor sa nasangpit nga siyudad Hon. Leni Robredo alang sa pagtunol sa pipila ka mga proyekto ug programa sa gobiyerno. Niresulta ang maong pagbisita ni PBBM sa pagbaniog sa isyu nga si Robredo na ang posibleng suportahan sa pangulo alang sa pagka presidente sa 2028.
Apan nakurat ang tanan niining milabayng bulan sa Pebrero pagdeklara ni VP Sara Duterte nga modagan siya pagka Presidente sa 2028. Kini ang nitagbo sa mga Impeachment Case nga gipasang-at batok sa Bise ngadto sa Kongreso. Tungod niini daw nataranta ang mga kontra-partido ni Duterte, dayun ug pagawas ug mga pamulong batok sa mga Duterte.
Sa laing bahin, nakurat usab ang mga kaalyado sa administrasyon sa Kamara sa dihang gianunsyo ni Cong. Ronaldo Puno, National Chairman sa National Unity Party (NUP) ug House Deputy Speaker pagdeklara niya dili mosuporta sa impeachment case batok Duterte kung dili makumpleto ug dili mapalig-on ang mga ebidensiya nga mopakusog sa maong kaso didto sa Kamara. Gitan-aw dayun kini sa publiko nga pagbuhi sa pinakadakung partido sa Kongreso sa alyansa sa administrasyong Marcos. Giisip usab dayun kini sa mga kaalyado sa pangulo nga pagdepensa ni Puno nang Inday Sara sa ginaatubang niini nga Impeachment Case.
Tungod sa pinakaulahing panghitabo sa natad sa politika, gilantaw sa publiko nga modaghan pa ang mga politiko ug partido nga moambak ug mokiling sa mga Duterte. Dili ikalimud nga nadugangan ang pagkusog sa anak ni FPRRD sa mata sa publiko, hinungdan nga nagsugod na ug biya ang ubang iladong politiko sa administrasyon ug ug nakig alyado kang VP Sara.
Pangutana sa katawhan karon, mapalagpot ba gyud ang Bise sa pwesto. Ang mga Impeachment Case nga giatubang ni Sara sa kasamtangan nagtangag ug silut nga “removal from office” ug “perpetual disqualification to hold public office.” Kung mahitabo nga molampus ang maong mga kaso batok sa Bise mahimong posible nang modaug ang i-endorso sa adminstrasyon sa 2028 ug maguba ang kamada sa alyansant Duterte.
Ang pangutana, molampus ba gyud ang mga kaso ni VP Sara sa Kongreso? Kay kung dili, siya na ang mosunod nga Presidente sa nasud human ni PBBM.
