Gipasigarbo karon sa lokal nga panggamhanan sa Dakbayan sa Dabaw nga nagpabiling giila ang syudad isip usa sa mga labing dato nga syudad kabahin sa assets ug equity sa tibuok Pilipinas kaniadtong tuig 2023.
Base sa financial report gikan sa Commission on Audit, kon COA, nakapwesto ang Davao City sa ika-9 nga ranggo sa mga syudad nga adunay pinakadako nga assets ug equity.
Misaka ang assets niini gikan P29.7 billion sa 2022 ngadto sa P32.9 billion sa 2023.
Samtang, ang net assets o equity niini nisaka usab gikan P21.2 billion sa 2022 ngadto sa P24.9 billion sa 2023.
Gawas niini, nagpabilin nga walay utang ang Davao City, usa ka pamatuod sa lig-on nga pinansyal nga kapasidad sa syudad aron pondohan ang dagkong proyekto.
Gipasabot usab sa Davao City Budget Office nga prioridad gihapon ang social welfare, healthcare, disaster risk reduction and mitigation, edukasyon, ug agrikultura ug uban pang mga programa sa syudad diin gihatagan kini og igo nga pondo.
Nagapadayon ang City Government of Davao sa pagpalambo ug pagpasiugda og sustainable development alang sa kaayohan sa syudad ug sa mga Dabawenyos.
