Ginalaraw na sa lokal nga panggamhanan sa dakbayan sa Davao ang pagpatuman sa digitalisasyon sa City Civil Registrar’s Office niini karong umaabot nga tuig 2025.
Niadto lamang disyembre 12, gi-aprubahan sa konseho ang ordinansa nga magmugna sa usa ka Civil Registration Information System kon CRIS online.
Usa lamang kini sa mga tinguha sa administrasyon ni Mayor Sebastian Duterte nga maghanyag og modernisado ug episyente nga serbisyo publiko alang sa mga Dabawenyo.
Sumala ni Konsehal Bonz Andre Militar, labaw sa Committee on Information Technology, Matubag sa maong ordinansa ang bulto sa mga mano-manong proseso sa City Civil Registrar’s Office ning kasamtangan.
Gipasabot ni Militar nga pinaagi sa CRIS, mamahimo nang digital ang mga record nga gikan pa tuig 1945.
Mamahimo na sab nga I-access sa publiko ang ilang civil registry documents sama sa birth certificates, nga di na manginahanglan pa sa pag-adto mismo sa opisina sa City Civil Registrar’s Office kon CCRO.
Dugang pa ni Militar may mekanismo sab nga mugnaon alang sa mga ahensya sa pagsumite nila og mga dokumento.
Kasamtangan nang ginahimo sa City Information Technology Center kon CITC ang CRIS, nga tinguhang malusad sa sayong bahin sa umaabot nga tuig.
