by James Galay
Gibutyag karon sa philippine statistics authority nga ang dakbayan sa davao, ubos sa pagdumala ni mayor sebastian duterte, ang dunay labing paspas nga pag-ugmad sa ekonomiya niadtong tuig 2023 nga anaa sa 7.5 percent.
Mas taas sab kini kun itandi sa 6.7 percent nga pag-ugmad sa ekonomiya nga natala sa tibuok rehiyon niadtong milabayng tuig.
Gisundan ang dakbayan sa davao sa davao del sur nga dunay 6.5 percent, davao de oro nga dunay 6.1 percent, ug davao del norte nga dunay 6.0 percent, samtang 4.7 percent ang natala sa davao occidental, ug 4.6 percent sa davao oriental.
Dugang pa niini, ang dakbayan sa davao sab ang may labng dakong kontribusyon sa 1.02 trillion pesos nga gross domestic product kon gdp sa rehiyon nga anaa sa 52.3 percent.
Sumala ni city treasurer atty. lawrence bantinding, nakatampo niini ang pagsaka sa koleksyon sa business ug real estate taxes karong padayon ang pagbawi sa dakbayan gikan sa covid-19 pandemic.
Gani, anaa na sa lapas 11.8 billion pesos ang nakolektang buhis sa dakbayan gikan enero hangtod oktubre ning tuiga, nga milapas na sa 11.3 billion pesos nga nakolekta sa samang panahon niadtong tuig 2023.
