Ginapakusgan karun sa Davao City Health Office ang ilahang mga lakang batok sakit nga dengue pinaagi sa pagpakusog sa mga nagkadaiyang Barangay Dengue Task Force.
Sumala ni Melodina Babante, head sa tropical diseases division sa Davao City Health Office, padayon niining gina-awhag ang tanang barangay officials ning siyudad nga tutukan ang pagmugna og barangay mosquito-borne viral task force arun nga mapugngan ang ihap sa mga indibidwal nga matapdan niini.
Gipahinumduman usab niini ang tanan nga imintinar ang kalimpyo sa panimalay ilabi na ang pagsigurong walay mga pundong tubig ulan sa likuran og kiliran sa mga panimalay nga pupuwedeng mapuy-an sa mga lamok.
Subling gi-awhag usab karun ang tanang dabawenyo nga daling muduol sa pinakaduol nga balay tambalan panahon nga makasinati og simtomas niini sama na lamang sa kalintura, pagsuka, rashes ug uban pa.