Ipatuman na sa SM Lanang Premier ug SM City Davao ang City Ordinance 0155-23, nga maghanyag og libreng sine alang sa mga rehistradong person with disability kon pwd sa dakbayan sa davao.
Kinahanglan lamang nga ipresenta ang PWD id ug ang movie pass booklet nga makuha gikan sa Persons With Disabilities Office kon PDAO ngadto sa sinehan sa SM Lanang ug SM City Davao.
Ginahanyag ang pribilehiyo matag lunes atol sa first screening sa pelikula, hinuon dunay diskresyon ang mga sinehan nga maghanyag og mga dugang adlaw alang niini.
Apan, dili aplikable ang pribilehiyo ngadto sa special cinemas sama sa imax, directors’ club, 3d ug 4d theaters, sponsored movie premiers, pay-per-views, ug uban pa.
Kun buot sa pwd nga molantaw ug lain pang pelikula, mahatagan gihapon siya og 20 porsyento nga diskwento sa presyo sa ticket.
Gidayeg usab ni 20th Davao City Council Committee on Games and Amusements chair Konsehal Jessica Bonguyan ang SM Prime Holdings tungod sila ang nanguna sa pagpatuman sa maong benepisyo alang sa mga dabawenyong PWD.
