Mokabat sa 193.7 bilyones ka pesos ang halinon sa mga propidad sa gobiyerno nga buot ibaligya ni Presidente Ferdinand “Bongbong” Marcos alang sa pagpalit ug dugang suplay sa petrolyo taliwala sa krisis sa langis gikan sa Tungang Sidlakan.
Lakip sa ipamaligya sa gobiyernong Marcos ang mga mosunod:
1) Atrium of Makati
2) Mile Long complex
3) ug kabahin sa Food Terminal Inc. (FTI) nga propidad sa Taguig
Tinguha sa Pangulo nga mapun-an ang suplay sa petrolyo sa nasud nga mokabat ngadto sa 50 hangtud 60 ka adlaw. Butang nga gikabalak-an sa katawhang Filipino kung makalahutay ba ang nasud taliwala niini nga krisis.
Hinunoa, kasamtangang nagapadayun ang negosasyon sa liderato ni Marcos ngadto sa ubang mga nasud nga adunay langis alang sa dugang suplay sa nasud.
Kung magmalampuson kining tanang tinguha sa gobiyerno sa Pilipinas magpadayun nga adunay suplay sa nasud apan magpabilin usab nga apektado ang ekonomiya tungod padayon gihapon ang pagsaka sa presyo sa mga produktong petrolyo.
Bisan ang Department of Energy nagbutyag nga adunay moabutay nga 250,000 – 300,000 bariles nga krudo gikan sa isa ka Southeast Asian nga nasud karong semanaha. Dugang pa ni Energy Secretary Sharon Garin nga ang maong dugang order sa krudo kabahin sa mga paningkamot sa gobiyerno alang sa pagtabang sa mga pribadong kumpanya sa langis sa ilang pag angkat ug petrolyo sa umaabot.
Gibutyag usab ni Garin nga dili moundang ang gobiyerno sa pagpangita ug dugang suplay sa petrolyo gamit ang gobiyerno-sa-gobiyerno nga pag-angkat ug petrolyo apan ibaligya sulod sa nasud Pilipinas sa presyong base sa kasamtangan.
Sa laing bahin, ang maong mga panghitabo sa atong ekonomiya kamatikdan nga daw walay klarong pag pangandam ang gobiyerno sa kahimtang sa suplay sa nag-unang produktong gikihinahanglan sa matag pamilyang Pilipino — ang bugas. Tungod sa padayong pagtaas sa presyo sa produktong petrolyo ug sa nagpadayon usab nga kasamok sa tungang sidlakan ilabina sa epekto niini sa biyahe sa mga tanker didto sa straight of Hormuz dili malikayan nga maapektohan usab ang suplay sa bugas.
Ang pangutana karon sa katawhang Pilipino;
1) bastante pa ba ang humay sa nasud?
2) Makaangkat pa ba Pilipinas gikan sa Vietnam ug Thailand sama sa naandan kung adunay kakulangon sa suplay sa bugas sa nasud?
3) dili ba pugngan sa Vietnam ug Thailand ang ilang humay ug ireserba na lamqng alang sa ilang kaugalingon tungod sa hulga sa giyera sa Amerika ug Israel batok Iran nga niresulta sa kagubot sa mga nasud palibot sa Persian Gulf?
4) unsa kaha ang pagpangandam sa gobiyernong Marcos alang niini nga hulga? Aduna ba’y pagpangandam labot niini ang atong gobiyerno?
Kini mao ang mga lehitimong pangutana nga delikadong kung wala gipangandaman sa gobiyerno sa kasamtangan.
Dili paigo ang paghatag lamang ug cash assistance ngadto sa nagkalain-laing sektor gikan sa gobiyerno tungod unsa ma’y pulos sa kwarta kung wala na’y mapalit nga pagkaon ang pamilyang Pilipino.
