Dugay nang panultihon nga angay lang hisgutan ang politika kung duol na ang eleksyon. Kini tungod kinahanglan magtrabaho ug magserbisiyo usa ang mga napiling opisyales sa ilang mandato ug makita usab ang ilang agi sulod sa termino sa ilang katungdanan.
Apan isip usa ka responsableng sakop sa katilingban kinahanlang ilhon ang pagkatao sa mga politiko nga buot moapil sa bugnong logaynon o eleksyon ug mapili ang saktong kandidato sa sakto usab nga posisyon sa gobiyerno.
Kahinumduman nga sa pag apil ni kanhi Mayor, kanhi Senador ug kanhi Presidente Joseph “Erap” Estrada daghan ang nisuporta kaniya hangtud nga nahimo siyang ika-13 nga Presidente sa Pilipinas human sa termino ni kanhi Presidente Fidel V. Ramos niadtong 1998. Nidaug si Erap tungod sa iyang kasikat sa pagka artista sulod sa dugay nga panahon. Apan tungod sa iyang kakulang sa kahanas sa trabahong pang gobiyerno ug politika wala niya mahuman ang iyang termino sa pagka Presidente tungod natanggal kini sa posisyon human gipasakahan ug kasong korapsyon nga nahimong pabilo sa pag alsa sa katawhan ug namugna sa EDSA Dos o ikaduhang EDSA People Power Revolution. Tungod niadto gibalhog sa prisohan si Estrada ug nahimong ikatulo sa mga Presidente sa nasud nga adunay pinakamubo nga termino human nila Emilio Aguinaldo ug Sergio Osmeña.
Karon, singgit sa katawhan nga nasayop kuno sila pagpili kang Presidente Ferdinand “Bong-bong” Marcos tungod wala niini mapatuman sa ensakto ang iyang katungdanan isip tigdumala ug tinugyanan sa nasud human gipili sa bagang duot sa katawhang Pilipino niadtong Eleksyon 2022. Base sa mga balita ug mga reklamo sa iyang liderato nga nibalik ug kakusog ang ilegal nga droga ug nisamot ang pagkuyanap sa korapsyon sa nagkalain-laing ahensiya sa gobiyernong Marcos. Apan hangtud sa kasamtangan, wala pay pormal nga kasong gipasang-at ug gipahamtang batok PBBM sa saktong korte samtang ang IMPEACHMENT COMPLAINTS nga gipangduso ngadto sa Kongreso pulos nangapakyas nga ipaapruba sa plenaryo.
Tungod niining mga panag-ingnan o ehemplo sa maingong sayop sa pagpili ug kandidato nga gibutang sa posisyon nalangan ang pag-uswag sa atong gobiyerno ug nakadaut pa hinuon sa atong pang gobiyerno ug ekonomiya. Dugang niini daghang kwarta ug bahandi sa gobiyerno ang nausik ug nangahanaw tungod gipangkawat sa mga mapahimuslanon ug kawatang opisyales sa gobiyerno sa nasud.
Busa angayan ra gyud nga hisgutan ug sayo ang politika ilabina ang mga politiko nga buot mosalmut sa bugnong lugaynon aron mapili ug mabutang sa saktong pwesto ang saktong politiko. Labaw sa tanan, aron mabuhinan kung dili man mawagtang ang korapsyon sa gobiyerno. Dili paigo ang pagboto lamang base sa konsensiya kundili kinahanglan usab masiguro nga adunay katakus, saktong kahibalo ug kahanas ingun man kahadlok sa paghimo ug dili maayo sa katungdanan ang pilion nga kandidato.
Samtang katungod sa matag Pilipino ang pagboto, responsibilidad usab nato ang pagpili ug opisyal nga dili korakot, masaligan sa katungdanan ug moprotektar sa interes, katungod ug dignidad sa katawhan ug matag pamilyang Pilipino.
