Mitala ang davao city police office-traffic enforcement unit og pag-ubos sa ihap sa mga bangga sa dalan gikan enero hangtod oktubre ning tuiga kun itandi sa samang panahon sa tuig 2023.
Segun ni DCPO spokesperson police captain hazel tuazon, anaa sa 3,581 ka insidente sa bangga ang natala karong tuiga, mas ubos sa 4,200 niadtong milabayng tuig.
Dugang pa niini, anaa sab sa 7,079 ang mga nalambigit sa mga insidente sa bangga sulod sa napulo ka bulan ning tuiga, kun itandi sa 8,571 sa miaging tuig.
Sa datos sab sa dcpo-teu, nag-una ang mga pribadong sakyanan sa mga malambigit sa bangga, ug gisundan sa mga motorsiklo ug mga truck.
Human error sab ang sagad hinungdan sa mga bangga nga anaa sa 97 porsyento, ug gisundan sa daut sa sakyanan nga anaa sa 2 porsyento ug sa daut nga dalan nga anaa sa 1 porsyento.
86 Porsyento sa mga bangga ang miresulta sa kadaot sa propedad, 12 porsyento sa minor physical injuries, ug tig-usa ka porsyento sa serious physical injuries ug kamatayon.
Nasayran sab nga sagad sa mga bangga, matala sa carlos p. Garcia highway kon diversion road, mcarthur highway, sasa, tibungco, ug bunawan, nga sagad sab mahitabo gikan alas 2:00 hangtod alas 4:00 sa hapon. [James Galay/Photo courtesy: City Government of Davao]
