Sa atong pagbalik sa sirkulasyon hisgutan nato ang bag-ohay lang nagviral nga “fire trike” nga nikabat kuno ug 10 million ang matag usa.
Human nga nag viral sa social media ang “fire tricycle” o bao-bao nga bumbero giulan ug batikos si DILG Sec. Juanito Victor “Jonvic” Catibayan Remulla, Jr. sa mga netizens. Sa mga post sa social media (socmed) nigawas nga namalit ang DILG ubos sa pagdumala ni Remulla ug mga “fire tricycles” nga mokabat ug 10 milyon ka pesos ang isa matud pa.
Apan hugtanon kining gipanghimakak sa kalihim dungan ang pagbutyag nga dili kini programa sa DILG kundili iya lamang kini sa lokal nga panggamhanan sa Nueva Ecija. Gipahigayon ang maong programa Hulyo niining tuiga sa gobiyernong lokal.
Plano sa Gobiyerno alang sa BFP
Kaniadtong Oktubre 3, gibutyag ni Sec. Remulla nga mobiyahe sila sa South Korea paglabay sa duha ka semana alang sa gobiyerno – sa – gobiyerno nga kasabutan sa pagpalit ug 1,500 ka fire trucks.
Dugang sa kalihim nga nakapalit na kanhi ug mga fire truck ang gobiyerno sa kantidad nga tag P16 million ang isa. Apan sa bag-o ug pinakaulahing plano nga pagpalit ug mga fire truck mokabat na lamang kini sa 10 milyones ka pesos ang matag usa. Matud pa niya nga nakadaginot ang gobiyerno niining higayuna ug dul-an 9 bilyones ka pesos sulod kapin 3 ka tuig. Dugang deklarasyon ni Remulla nga sa maong programa mopalit ang gobiyerno nga siguradong walay korapsyon. Apan giklaro usab sa kalihim nga i-finalize pa ang nahisgutang plano sa gobiyerno.
Hagit sa Sunog
Daghan ang nagyaga-yaga o nag bash sa social media batok sa “fire trike” apan kung tan-awon ug maayo ang mga komunidad sa Pilipinas daghan pa gihapon ang mga iskwater areas. Kung iskwater area, expected nang daan nga gagmay kini ug mga dalan tungod wala’y klarong subdivision plan. Dinhi na ang dakung problema kung dunay mahitabong sunog. Tungod sa apiki kaayo ang mga dalan maglisud gyud ug sulod ang mga fire trucks…busa mahulog nga wala’y pulos bisan pa’g unsa ka-hitech ang mga bumbero. Apan kung duna’y “fire trike” mahimo na kining makasulod sa mga gagmay nga dalan ug makapaduol sa nasunog nga gambalay.
Sama pananglitan sa Davao City, kung subayon ang mga barangay gikan Lasang hangtud sa Toril daghan pa kini ug mga iskwater areas nga gagmay pud ug mga dalan, ug ang uban niini dili masulod ug mga sakyanan — bisan motorcycle o tricycle dili mn pud gani makasulod.
Pag-improve sa Bumbero o BFP
Kung aduna ma’y plano nga palamboon o i-improve ang Bureau of Fire kabahin sa ilang kapasidad kinahanglan nga himuon kining malangkubon (inclusive). Maayo ang programa sa gobiyerno nga mopalit ug 1,500 ka fire truck. Apan kinahanglan gihapon nga tan-awon sa gobiyerno ang kinatibuk-ang kahimtang sa mga komunidad sa nasud. Kinahanglan nga apilon usab sa ilang plano kanunay ang mga gagmayng katilingban nga iskwater areas. Kinahanglan ang mga gagmay nga bumbero aron mas mapadali ang pag sumpo sa mga sunog. Ang mga gagmayng bumbero ang magsilbing “initial response” sa emergency unit sa barangay kung magsugod na ang kalayo.
