Gi-awhag sa Davao City Health Office ang mga dabawenyo nga magpabiling alerto ug mabinantayon batok sa monkeypox kon Mpox, human makumpirma nga dunay duha ka kaso sa maong sakit dinhi sa dakbayan.
Sumala pa ni Cho-City Epidemiology and Surveillance Unit Section Head Farah May Clamor, ginarekomenda nila nga likayan ang skin-to-skin contact sama sa pakighilawas, paghalok, ug paggakos sa mga indibidwal nga dunay mpox.
Kinahanglan sab batasanon ang kanunayng paglimpyo sa kamot, pag-disinfect sa mga butang ug lugar, ug paglikay sa mga hayop nga posibleng gadala sa kagaw.
Giduso sab ang sayong konsultasyon ilabi na sa kabatan-onan, mabdos, ug mga immunocompromised.
Motakod ang mpox pinaagi sa panit, ug lakip sa mga simtomas niini ang pagpangatol, hilanat, paghubag sa lusay, pagsakit sa lawas, kakapoy ug pagpangluya.
