Daghang salamat sa Mindanao Journal family ilabina kang Sir Jun Ledesma nga naghatag kanako ug higayon nga makapaambit ug impormasyon sa publiko pinaagi niining column nato MGA ISYU KARON.
Isip usa ka sakop sa industriya sa media atong ginapaninguha nga mapaambit sa publiko ang unod sa mga panghitabo sa atong palibot ilabina kung may kalabot sa panggobiyerno nga makaapekto sa kinabuhi sa matag pamilyang Pilipino. Tinguha nato nga matuki ug ipasibaw ngadto sa katawhan ang mga mahinungdanong isyu karon sa atong katilingban aron maedukar ang katawhang nagpakabana sa komunidad.
Bag-ohay lang, nagpahigayon si Bise Presidente Sara Duterte ug usa ka presscon diin iyang gipahayag ang pinakadakung balita nga buot niyang molansad sa pagka Presidente sa nasud sa umaabot nga eleksyon sa tuig 2028.
Sa batakang balaud o Philippine Constitution of 1987 sa Article VII, Section 2 kini nagkanayon,
“No person may be elected President unless he is a natural-born citizen of the Philippines, a registered voter, able to read and write, at least forty years of age on the day of the election, and a resident of the Philippines for at least ten years immediately preceding such election.”
Mao ni ang bahin sa batakang balaud sa nasud nga naghatag kang VP Sara ug ka tungod nga modagan sa pinakataas nga posisyon sa gobiyerno sa tuig 2028. Sumala sa nahisgutang balaud nga pasado na ang natural-born citizen ug natawo gikan sa mga Pilipino nga ginikanan diri sa nasud ug kabalong mosulat ug mobasa. Si VP Sara gipanganak sulod sa nasud sa mga Pilipino nga ginikanan niadtong Mayo 31, 1978 ug kasamtangang anaa na sa 47 ang iyang pangidaron, gradwado sa kolehiyo ug sa abogasya, dugang pa niana, lisensiyado usab nga abugado. Buot pasabot, pasado kaayo sa pagakapangulo sa nasud kung botaran sa bagang duot sa katawhang Pilipino.
Apan human nga nideklara ang anak sa kanhi Presidente Rodrigo Roa Duterte sa iyang tumong sa eleksyon 2028 namatikdan sa publiko nga daw nataranta ang mga kontra-partido tungod sa ilang mga negatibong reaksyon. Managlahing reaksyon ang nigawas sa mga “netizens” sa “social media” ug facebook. Bisan sa mga lokal ug national nga mga mantalaan ug mga sibyahanan duna usab managlahing kumentaryo. Isa si Mon Tulfo ang namatikdan sa mga nibuhi ug bug-at nga pamahayag ug kumentaryo batok VP Sara isip timaan sa iyang dakung pagsupak sa plano sa Bise Presidente.
Sa laing bahin, kahinumdoman nga nagsige na usab ug pagawas ug pahayag si Senadora Risa Hontiveros sa iyang intensyon usab nga abli siya sa posibilidad nga modagan sa pagka Presidente o Bise Presidente, depende sa madesisyonan unya sa ilang ginamugna nga united opposition para sa 2028. Kamatikdan usab nga daghan ang ni batikos sa Senadora tungod sa iyang mga pamahayag kalabot sa eleksyon 2028.
Ang pangutana niining MGA ISYU KARON gikan sa katawhan, kinsa ba gyud ang mag atbangay sa 2028 National Elections? Ma- Impeach ba gyud si VP Sara? Kay kung pananglitan ug ma-impeach siya siguradong moluag gyud ang ginhawa sa iyang mga kontra-partido. Apan ug dili siya madutlan sa mga kaso batok niya karon sa Kongreso murag sigurado na o duol na gyud sa tinuod ang iyang kadaugan.
Mga higala, atong atangan ang MGA ISYU KARON ug padayon tang magpakisayud sa MGA ISYU KARON.
