Gipahimangnoan karon karon ni Davao City Mayor Sebastian “Baste” Duterte ang mga Dabawenyo nga hugot nga tumanon ang City Ordinance 060-22 kon firecracker ban alang sa kaluwasan sa tanan karong panahon sa pasko ug sa umaabot nga bag-ong tuig.
Atol sa Basta Dabawenyo program niini, nagbahad si Mayor Baste sa mga masinupakon nga mag-atubang sila og mga bug-at nga silot kun mogama, mobaligya, manag-iya, o mogamit sila og mga pabuto ug uban pang pyrotechnic devices.
Makasuhan ang mga malapason sa ordinansa og multa gikan 1,000 hangtod 5,000 pesos o pagkapriso gikan 20 ka adlaw hangtod unom ka bulan, depende sa kun makapilang higayon na silang nasikop.
Mamahimo sab nga pahamtangan sila og parehas multa ug pagkapriso.
Nagaawhag sab si Mayor Baste sa publiko nga mangita na lamang og luwas nga mga pamaagi sa pagsaulog sa pasko ug bag-ong tuig inay magpabuto.
Karong tuiga, anaa na sa ika-23 nga tuig ang pagpatuman sa firecracker ban lukop dakbayan, nga nahimo sab nga malampuson sa pagpakuhod sa mga maangol ug mamatay tungod lamang sa paggamit og mga pabuto. (Photo courtesy: CIO)
