Personal nga gitunol sa hepe sa City Disaster Risk Reduction Management (CDRRM) Alfredo Baloran ang mga hinabang pinansyal niadtong niadtong Martes, Pebrero 4 alang sa mga lokalidad sa Negros Oriental ug Negros Occidental nga naapektohan sa pag-ulbo sa Bulkang Kanlaon.
Gibutyag ni Baloran nga personal usab nga gidawat ni Negros Occidental Governor Eugenio Jose Lacson ang 1 Million pesos nga tseke.
Gawas pa niini, nadawat na sab nila Bago City Mayor Nicholas Yulo ug La Carlota City Mayor Rex Jalando-on ang tig-500,000 Pesos nga hinabang pinansyal.
Samtang, nadawat na sab ni Negros Oriental Governor Manuel Sagarbarria ang 1 Million pesos nga hinabang, ingon man natunol na sab ang 500,000 pesos ngadto sa dakbayan sa Canlaon, ug 300,000 pesos alang sa lungsod sa Vallehermoso.
Kahinomduman nga gipaubos ang mga nasangpit nga lokalidad sa state of calamity, ug dunay kinatibuk-ang lapas 6,300 ka mga indibidwal ang apektado ug padayong nanginahanglan og hinabang aron makabawi sila gikan sa danyos sa maong katalagman.
