In Photo: Gisugat sa mga molupyo si Butchoy Taojo
Davao de Oro – Gidagsang sa linibo ka mga tawo ang unang kahigayunan nga miuban si Noe “Butchoy” Taojo sa pakigtagbo sa grupo nila ni Rep. Ruel P. Gonzaga ug ang kapikas niini nga kasamtangang Gobernadora Dotdot Gonzaga sa mga molupyo sa Barangay Bongbong ug Barangay Tagdangua sa Pantukan.
Dili kapugngan ang kalipay sa mga katawhan sa naasoy nga mga barangay sa dihang ilang personal nga nahimamat ang ambungang Butchoy Taojo nga nagpapili bilang kongresista sa ika duhang distrito sa Davao de Oro.
Ilado si Butchoy Taojo nga usa ka pilantropo o maghinatagon ug matinabangon dili lang sa Distrito2 kon dili sa tibook probinsya sa Davao de Oro apil na ang Davao del Norte.
Ang estorya sa iyang kinabuhi misilbi usab nga usa ka inspirasyon sa mga ordinaryong tawo nga naay tinguha nga molambo. Usa ka abantero sa minahan sa Diwalwal si Butchoy. Human nga nakakat-on kini sa mga paagi sa mga gagmayng minero nanimpalad kini sa Boringot, Pantukan, Davao de Oro.
Ngipanalanginan si Butchoy sa iyang paningkamot ug panginuha kay milambo ang iyang minahan ug gibansagan na kini nga “large scale mining operation”. Gisuklian ni Butchoy ang iyang mga naamgo nga mga panalangin pinaagi sa pagtabang sa mga pobreng nanginahanlanon og tabang. Gani mi-donar siya og dakong kantidad alang sa pagtukod og 22 ka mga konkretong balay para sa pipila ka mga biktima sa Masara land slide.
Usa sa mga miagni ni Butchoy Taojo nga magpapili bilang kongressma sa distrito dos mao ang iyang suod nga higala, ang kanhi gobernador sa Davao de Oro nga si Arturo “Chiongkee” Uy nga mas ilado karon nga Papa Gob.
Sa tinguha nga magka-inusara ang mga nagpapili sa lain-laing position sa probinsya boluntaryong mipahikling si Papa Gob ug ang anak niining si Tyrone Uy, ang kasamtangan nga bise gobernador, aron mapundar ang Unity Ticket nga gika-uyonan sa tanang hingtungdan.
Sumala sa ilang gikasabutan si Ruel Gonzaga maoy modagan pagka-gobernador ug ang asawa niini nga si Dotdot sa pagka-bise gobernador. Si Maricar Zamora magpapili pag-usab sa pagka-kongresista sa 1st District ug si Noe “Butchoy” Taojo ang modagan pagka-kongresista sa 2nd District.
Nabungkag ang panaghiusa-usa sa dihang nag-file og Certificate of Candidacy ang bana ni Maricar nga si Ruel Mabanglo unya ilang gibutyag sa publiko nga ilang kandidato sa pagka-kongresista sa 2nd District mao si Jong Ceniza ang kasamtangang mayor sa Pantukan.
Nakugang sila Gonzaga, Butchoy ug Papa Gob sa dihang wala damha gitalikdan nila Maricar Zamora ang ilang gikasabutan.
Sa maka-dyot daw sa batay-og ang kampo nila Gonzaga, Butchoy ug Papa Gob labi na kay wala silay kandidato sa pagka-kongresista sa 1st District. Si Franco Tito nagpapili pagkakongresista apan usa ka Independyente nga kandidato. Gitu-ohan nga may-poruhan nga suportahan kini sa grupo nila Gonzaga aron sumpo-on ang plano ni Maricar nga makabalik sa Kongreso.
Ang gipakitang nagtipon-og nga suporta sa mga taga Pantukan kang Butchoy Taojo gi-tuohan nga maoy mopokan sa paninguha sa grupo nila Maricar Zamora. Dili ikalimud nga bisan pa wala magpapili si Papa Gob ug si VG Tyron Uy nagpabilin maunongon ang ilang mga lideres sa tibook Davao de Oro.
