Andam na ang Davao City Overland Transport Terminal alang sa pagdagsa sa mga pasahero karung semana santa nga mupapauli sa ilahang mga nagkadaiyang probinsiya arun sa kasaulogan.
Sumala pa ni Dr. Aisa Usop, DCOTT Manager nga bastante ang mga bus nga nagabyahe ning kasamtangan kung diin hugot usab ang ilahang pagpatuman sa saktong mga lakang alang sa pagsigurong mamahimong luwas ug hapsay ang byahe sa tanang pasahero. Dugang pa sa maong opisyal nga padayon gihapon ang ilahang pakig-koordinar sa uban pang mga security cluster arun nga masigurong layo sa peligro ang mga pasahero ayha mubyahe.
Nagpahinumdom usab ang maong opisyal ngadto sa tanang mga bus driver sa saktong pagsunod sa ‘no pick-up policy’ lakip na usab ang mga pasahero sa pagsunod niini pinaagi sa pagtahan sa ilahang buhatan og didto na lamang manukad.
