Mga Nograles ug Al-ag pildi sa Ateneo survey

Photo: Resulta sa Ateneo Blue Vote 2025 survey

 * fPRRD, Baste, Polong, Omar  morag modaugay

 * Maglana mas taas ang puntos kay sa kay Migs

Si Kanhi Pangulo Rodrigo Duterte ang napili sa mga Atenista pagkamayor kontra sa ka-atbang niini nga si Former Civil Service Commission (CSC) Chairperson ug ex-three term Congressman Atty. Karlo Nograles sa gipahigayon nga Ateneo de Davao University’s Blue Vote 2025 in-campus survey alang sa May 2025 midterm elections.

Gipagawas sa Ateneo ang maong resulta pinaagi sa virtual presentation nga gi-stream sa ilang opisyal nga Facebook Page kaniadtong Marso 28, 2025.

Base sa resulta sa survey, nakuha ni Duterte ang pinakataas nga boto nga 68.37%, gisundan kini ni Nograles sa ikaduhang pwesto nga nakakuha og 10.20%, samtang ang Pangulo sa Love Philippine Movement (LPM) Rodolfo “Bishop Rod” Cubos ang nakakuha sa ikatulong pwesto nga 1.02%.

Nagpabilin sab nga 7.14% ang wala pa makadedisyon o undecided ug 6.12% ang miingon nga dili sila mobotar sa bisan kinsang pangalan pagkamayor nga gibutang sa survey.

Samtang, ang duha ka anak ni Duterte ug duha sa iyang mga apo ang nakakuha sab og maayong resulta sa maong survey.

Si Incumbent Mayor Sebastian “Baste” Duterte ang klarong modaog isip bise-mayor human nakakuha og 60% sa unang pwesto.

Ang kontra niining si Incumbent 1st District Councilor Bernie Al-ag ang nakakuha og 14% sa ikaduhang pwesto.

Si incumbent 1st District Representative Paolo “Pulong” Duterte posibleng mare-elect pagkakongresista human nakakuha kini og 56%.

Si NGO worker Mags Maglana ang nakakuha sa ikaduhang pwesto nga 24%. Gipildi niini

ang incumbent PBA party-list Representative Atty. Migs Nograles ang nakakuha lang og 5% sa ikatulong pwesto.

Sa laing bahin, miguwa usab nga mananaog ang mga anak ni Pulong nga si incumbent Barangay Buhangin Proper Captain Omar Duterte pagka-kongresman sa 2nd District human makakuha og 50% sa unang pwesto.

Ang laing anak ni Pulong nga si Rodrigo Duterte II, nakasulod sab sa Magic 8 isip konsehal sa 1st District human makakuha og 21% sa ikatulong pwesto.

Matod pa sa Ateneo, anaa sa 474 ka mga respondents ang mipartisipar sa online survey nga gilangkuban sa:

259 (54.6%) ka mga estudyante, 88 (18.6%) ka faculty members, 80 (16.9%) ka mga non-teaching personnel, 41 (8.7%) nga administrator, ug 6 (1.3%) ka formation nga mipartisipar sa online survey pinaagi sa University Research Council gamit ang Google Forms.

Gipasabot sa Ateneo nga gikan lamang sa mga mipartisipar nga respondents ang resulta niini ug dili sa tibuok Ateneo de Davao University.

Dugang pa sa tulunghaan nga ang non-partisan nga Blue Vote 2025 wala gikomisyon o gibayran sa gawas nga mga grupo gumikan fully funded kini sa Jesuit-run university.

Ang Blue Vote 2025 sa Ateneo de Davao University maoy ikaduhang survey nga gihimo sa mga magtutungha ug mga magtotudlo ug lain pang mga kawani sa unibersidad. Dili pa lang dugay, ang University of Mindanao Institute of Popular Opinion mipagula sa usa ka survey diin ang kanhi Presidente Rodrigo Duterte nag-una sa pagkamayor ug nakakuha kini og 60 percent sa voter preference, samtang ang iyang anak nga si Sebastian “Baste” Duterte, 55.7 percent sa pagka bise mayor. Ang ilang ka-atbang —Karlo Nograles ug si Bernie Al-ag—nangukahi sa puntos nga 10 percent ug 14 percent, matag-sa kanila.