Abli ang Davao City Tourism Operations Office sa sugyot nga usbon ang “no backpack policy,” nunot sa reklamo sa usa ka inahang wala gipasulod sa Rio Carnival Sa Coastal Road, gumikan sa iyang dala nga backpack nga may gamit sa iyang anak.
Sumala pa ni CTOO Head Jennifer Romero, balido ang reklamo sa maong inahan, ug mihulagway nga panahon na alang sa pag-usab sa palisiya.
Apan, giklaro ni Romero nga kinahanglan dili gihapon makompromiso ang seguridad ug kaluwasan sa katawhan sa pagahimuong pagbag-o sa maong lakang.
Angay sumala pa nga ibalanse ang kaluwasan ug ang kombenyenteng kasinatian sa mga torista sa syudad.
Ginaplastar na sab ang konsultasyon bahin niini tali sa public safety and security office ug sa opisina ni Konsehal Luna Acosta, Labaw Sa Committee On Peace, Order, And Public Safety Sa Konseho.
Samtang, gi-klaro usab ni PSSO Chief Angel Sumagaysay nga abli siyang usbon ang depinisiyon sa backpacks, ilabi na nga generic sumala pa ang paghulagway niini sa kasamtangang palisiya, ug duna sab managlahing kadak-on sa mga bag.
