Kasamtangang ginatun-an karon sa City Legal Office ang ordinansa nga nagtumong sa paghatag og trabaho alang sa mga senior citizens sa syudad sa Davao base sa pamahayag sa Public Employment Services Office (PESO).
Sumala pa ni PESO-Davao Manager Lilibeth Pantinople, gilauman nga ang legal review mao’y mosunod nga lakang aron masumite na ang ordinansa ngadto sa konseho sa syudad ug mapaabot dayon ang pormal nga deliberasyon.
Gisuportahan sa duha ka dagkong food chains ang maong inisyatibo ug andam na silang mopirma og Memorandum of Agreement (MOA) uban sa PESO ini’g apruba sa ordinansa.
Ang ordinansa gikan sa privilege speech ni Konsehal Diosdado Mahipus Jr. nga nag-awhag sa pagtugot sa mga seniors nga makatrabaho balik .
Base sa datos sa Social Welfare Operation Division, kapin 170,000 ka senior citizens sa siyudad ang posibleng makapahimulos sa maong programa nga nagtumong sa aktibong partisipasyon sa katilingban bisan pa sa ilang edad.
