Subling gipasalig ni Davao City Rep. Paolo Duterte ang iyang suporta sa pagpalambo sa Dakbayan, dungan sa paglimod sa mga pasangil kaniya nga iya kunong gibiyaan ang iyang mga tahas isip Kongresista.
Sa usa ka recorded nga mensahe nga gipaambit atol sa campaign rally sa Hugpong sa Tawong Lungsod sa Barangay 5-a, giklaro ni Congressman Pulong nga mahinungdanon ang panaghiusa ug pagsalig aron makab-ot ang usa ka malambuong Dakbayan sa Davao.
Sumala pa ni Cong Pulong, padayon ang mga programa ug proyekto sa iyang buhatan nga mopalig-on sa ekonomiya, katilingbanong kalamboan, ug inklusibong kahigayonan alang sa tanan.
Samtang, giklaro sa iyang anak nga si Rodrigo “Rigo” Duterte nga nagapadayon ang serbisyo sa First district office, ilabi na sa paghatag og tabang medikal ug emergency assistance.
Misegunda sab si Mayor Sebastian Duterte nga daghan na ang natabangan ni congressman pulong, ug nag-asoy nga mubalik sa nasud ang iyang maguwang sa dili pa ang piniliay Mayo 12.
