- Mga negosyante sa Pantukan nagkaproblema
- Gisupak sa Pantukan LGU ang Order sa Presidente? Gitubag ni Noe “Butchoy” Taojo ang mga pasangil nga giluwatan sa mga opisyales sa Pantukan diin gipasanginlan siya nga kuno ang iyang kompaniya nga Hexat Mining Corporation (HMC) wala gabayad og buhis ug business permit sa taas nga panahon. Ang maong isyu maoy gihimong hisgutanan sa usa ka press conference nga gipahigayon sa mga opisyalis sa Pantukan nga gipanguluhan ni Atty. Maribel Basadre-Cab,ang Municipal Administrator niadtong miaging semana. Sa naasoy nga presscon gipasanginlan ni Cab nga kono ang HMC wala gatuman sa ilang obligasyon sa pagbayad og buhis ug business permit sulod sa dugay nga panahon.
Ang maong pamasangil gipanghimakak kini ni Butchoy Taojo, sa proclamation rally sa Team Kalinaw sa Mawab niadtong Abril 5. Migawas sa iyang pamahayag agi’g tubag sa akusasyon nga giluwatan sa Municipal Administrator, nga gabayad siya. Ang naka-apan lang kay dugay ang processo sa renewal sa iyang business permit nga gisumitir niini kaniadto pang Enero. Sumala pa ni Butchoy nga Oktubre na gi-release ang business permit sa HMC.
Sa pakighinabi sa Mindanao Journal sa pipila ka mga negosyante sa Pantukan, nasayran nga sayo pa sa gi-asoy nga presscon, naa diay gihimong panagtigum ang mga negosyante nga gitambongan sa Mindanao Development Authority Secretary Leo Magno diin ilang gipasibaw ang pagkadelatar sa ilang kadaiyang business permit ug pagbayad sa toll fees sa kadalanan sa Pantukan. Sa maong panagtigum nga gitambongan usab ni Butchoy Taojo isip usa ka negosyante sa Pantukan, iyang gi-tambagan ang mga negosyante nga ipadayon lang ang ilang pagnegosyo samtang gahulat sila nga mapagawas ang renewal sa ilang permit.
Wala damha ni Butchoy nga wala diay mahimo-ut ang kagamhanan sa Pantukan sa iyang gihimong tambag nga ipadayon lang sa mga negosyante ang ilang operation samtang gahulat nga maisyu ang ilang permit.
Sa rally nga gipahigayon sa Mawab, gi-ankon ni Butchoy nga tinuod nga nagluwat siya sa maong tambag. Sa iyang kaugalingon nga kaso, unsaon na lang daw ang kahimtang sa kapin sa 3,000 niyang trabahante ug ihonong ang operasyon sa minahan sa HMC? Imo bang kapugngan nga mohimo og welga unya sa munisipyo sa Pantukan ug gutmon ang isig nila ka pamilya?, silbing tubag ug pangutana ni Butchoy Taojo.
Gipadayag ni Butchoy Taojo nga niadto wala may gihimong isyu sa lokal nga kagamhanan ang pagkadelatar sa iyang pagbayad gumikan ra usab sa pagkadelatar sa pag-release sa permit. Apan sa dihang mikandidato na siya bilang kongresista sa ika-duhang distrito sa Davao de Oro sunod-sunod naman ang mga isyu ug pang-ipit sa iyang negosyo.
Dugang pa ni Butchoy Taojo homan nga mifile sya sa iyang certificate of candidacy, gidabo-dabohan na sya gilayon og atake sa mga propagandista sa iyang ka-atbang. Unya, misugod ang pagpang-ipit sa iyang negosyo. Bisan tood nga naay gipagula nga Executive Order si Presidente Marcos niadto pang Septyembre 2023 nga nagpahunong na sa pag-pangulikta ug buhis sa kadalanan gipugos gihapon siya sa pagbayad. Gibayran kini ni Butchoy bisan pa nga naay mandato sa Presidente aron dili mahunong ang panginabuhi sa kapin tres mil nga trabahante sa HMC.
Sumala pa niya, mora sya ug gitunglo homan nga midagan sya pagka kongressman , apan ipadayon niya ang iyang pagpapili aron nga matagaan og kabag-ohan ang mga pamaagi sa negosyo ug uban pang problema nga gisagubang sa mga katawhan sa distrito 2.
