Hingpit nang gipatuman sa Konseho sa Dakbayan sa Davao ang Legislative Information Support System program kon LISSP or less paper session system nga nag-digitalize ug naghimong mas accessible sa mga dokumento gikan sa lokal nga lehislatura.
Subay kini sa city ordinance 0303-23 nga gilagdaan ni Mayor Sebastian “Baste” Duterte niadtong nobyembre 2023.
Gani niarangkada na ang less paper session system sa 20th Davao City Council atol sa 5th regular session, niadtong Pebrero 4,2025, adlawng Martes.
Gibutyag ni 1st Dist Councilor Bonz Andre Militar, chairperson sa Committee on Information Technology, ang pagpatuman sa Legislative Information Support System ( LISS) kabahin sa digitalization program sa gobyerno.
Gani, anaa na lamang sa lima ka ream sa bond paper ang ilang magamit matag bulan, gikan sa kanhing 700.
Pinaagi sa LISSP, digital na ang mga agenda, committee reports, ug uban pang mga dokumento, ug ipakita na lamang kini sa mga screen matag sesyon sa plenaryo.
Gibansay sab ang mga konsehal sa paggamit og mga tablet aron maanad sila sa bag-ong sistema.
Adunay tinag-usa ka mga ipad ang 28 miyembro sa 20th City Council lakip na si Vice Mayor J Melchor Quitain Jr subay sa gipatumang less paper session.
Paspas usab ang pag-access sa mga dokumento atol sa session ug sa mga ipahigayong committee hearings sa tabang sa City Information Technology Center. (Photo courtesy: Davao City Information Office)
