Gi-awhag ni Lingap para sa Mahirap Officer-In-Charge Ytalia Bohol, ang ilang mga kliyente nga isumite na lamang ang mga rekisitos pinaagi sa ilang facebook page alang sa mas kombenyente ug mas paspas nga pakigtransaksyon.
Segun ni Bohol, mas paspas ang pagproseso sa mga bill sa hospital, medical ug barangay certificates, ug uban pang dokumento kun isumite kini online.
Usa sab kini sa mga pamaagi sa lokal nga panggamhanan alang sa paghanyag og digital nga opsyon sa mga naandang pisikal nga transaksyon sa mga buhatan niini.
Hinuon, giklaro sab sa maong buhatan nga mamahimo gihapong personal nga isumite ang mga rekisitos sa ilang main office sa Spmc Compound, o sa ilang mga satellite office sa Bunawan, Calinan, Marilog, Paquibato, Toril, ug Poblacion districts.
Gigahinan og 600 million pesos ang Lingap para sa mahirap program sa local nga pang-gamhanan sa syudad karong tuiga, ug 200 million pesos nga mas taas kun itandi sa alokasyon niadtong tuig 2024.
