Photo: CIO
Malampusong gipahigayon ang labing unang panagpulong ang Davao City Halal Industry Development council niadtong Lunes, Pebrero 24, aron hisgutan ang Halal roadmap sa syudad.
Gipangulohan kini ni Davao City Halal Industry Development Council kon DCHIDC Chairperson nga si Atty. Jonah Presto ug sa Vice Chair niini nga si Marilou Ampuan.
Giduso sa panagpulong ang pagmugna sa Halal Industry Roadmap, nga gikuhaan og inspirasyon gikan sa four-year strategic plan sa Department of Trade and Industry kon DTI.
Tumong niini nga mapakusgan pa ang posisyon sa dakbayan sa Davao isip usa ka nag-unang halal hub, ingon man ang pagpalig-on sa halal nga turismo,ug pagpamatigayon.
Natuki sab ang labing ulahing katikaran sa draft halal industry ordinance, pagpangandam sa 10th Philippine halal trade and tourism expo, ug sa pagpalig-on sa estado sa dakbayan isip usa ka Muslim-friendly City.
Nakig-alayon na ang lokal nga panggamhanan sa syudad, Department of Trade and Industry-Davao, Mindanao Development Authority, ug ang Davao City Chamber of Commerce and Industry Incorporated, alang sa pagduso sa hiniusang halal roadmap ug sa pagmugna og nag-inusarang hala certifying body sa nasud.
Sumala ni Davao City Chamber of Commerce and Industry Incorporated President Dr. Roland Suico, tinguha niinng matubag ang mga mulo sa mga patigayon ug mga mamuhunan bahin sa mga kalisod sa documentation ug sa kadaghan sa mga agian nilang halal certifying bodies.
Gidugang pa ni Suico, buot sab tabangan sa inisyatibo ang mga ginagmay ug dinagkong patigayon pinaagi sa paghanyag og klaro ug plastado nga mga proseso sa halal certification sa mga produkto ug serbisyo.
Gi-anunsyo sab ni Suico nga bisitahan sa DCCCII ug Minda ang nasud Malaysia sunod bulan, aron tutokan ang pagsubay sa Philippine Halal certification ngadto sa mga internasyonal nga sumbanan.
Gilantaw kini sa opisyal isip pamaagi aron mapaugmad pa ang pagka-competitive sa industriya sa halal sa Pilipinas ngadto sa International Halal market.
