Kasamtangan nang ginaplastar sa konseho ang sugyot ordinansa nga magpanalipod sa mga katungod og pribilehiyo sa mga person with disabilities dinhi sa Syudad.
Sumala ni Committee on Civil, Political, and Human Rights chairperson, Konsehal Enzo Villafuerte, tubag ang maong ordinansa sa mga reklamong diskriminasyon nga nadawat sa Persons with Disability Affairs office kon PDAO.
Lakip na niini ang dili pagpasakay sa mga jeepney ug sa dili paghatag og 20 porsyento nga diskwento sa mga botika bisan gimando kini sa republic act 9442 kon magna carta for disabled persons.
Pakusgan sa ordinansa ang pagpatuman sa ra 9442, ug magpahamtang kini og mga silot sa mga dili moila sa mga pribilehiyo sa pwds, ingon man ang mga mogamit og peke nga pwd ids.
Dugang pa ni Konsehal Enzo Villafuerte duna sab ihanyag nga pinansyal nga insentibo alang sa mga pwd nga dunay permanenteng disabilities ug limitadong oportunidad sa pag-empleyo, ug kini ginahingpit na kaabag ang committee on social services.
Kasamtangang anaa sa ikatulong pagdungog sa komite sa Konseho ang nasanpit nga sugyot ordinansa.
